ROXAS CITY – Pilas sa ilong ang naangkon sang 42-anyos nga panday matapos nga ginaalegar ginlabo sang iya pakaduha sa Barangay Malagab-i, Cuartero, Capiz.
Ginkilala ang biktima kay Billy Pimentel Baltazar.
Samtang, ang ginatudlo suspek ang ginkilala kay Marjun Ireneo Cabison, 29-anyos, kag lunsay mga residente sang nasambit nga barangay.
Sandig sa inisyal nga imbestisgasyon ni PSSg. Edmer G. Dayalo sang Cuartero MPS, nga alas-4:30 kahapon sang Sabado sang yara sa ila balay ang biktima, ginapahayag nga nag-abot ang suspek kag ginkumprontar ini angut sa ginpahamtang nga kudal sa alagyan padulong sa balay sang suspek.
Nagpatunga ang mainit nga diskusyon sa duha kag ginaalegar ginlabo ni Cabison si Baltazar, nga naigo sa ilong.
Gilayon man ginpadulongan sang mga katapo sang Cuartero Emergency Response Unit (CERU) kag ginpandangat ang biktima sa Dao District Hospital.
Samtang ang suspek ang gilayon nga nagpalagyo bitbit ang iya 5-ka tuig nga bata nga lalaki, apang mga alas-9 sa gab-i, boluntaryo man ini nagsungka sa kapulisan.
Ginalantaw nga motibo amu ang daan nga hiligut-anon sa tunga sang magpakaduha.
Sa karon, nagapabilin ang suspek sa kustodiya sang mga kapulisan kag ginahulat ang mangin desisyon sang pamilya sang biktima kun pagapasakaan ini sang nagakaigo nga kaso.
