ROXAS CITY – Tuman nga kakulba ang nabatyagan sang magpamilya, matapos ginapahayag nga ginlagas ang mga ini sang kutsilyo sang ila kaiping balay.
Ginkilala ang biktima kay alyas “Jonel”, 46-anyos samtang ang ginapahayag suspek ang ginkilala kay alyas “Frederick”, yara sa legal nga pang-edaron lunsay residente sang Mejorada Subd., Barangay Inzo, Roxas City.
Sa exclusive interview sang Bombo Radyo kay alyas “Jonel” ginpahayag sini nga sang natabo ang insidente yara sila sang iya asawa kag tatlo ka anak sa Burgos Talipapa agud kun tani magpaninda apang hinali lamang siya nga ginbungguan ni alyas “Frederick”.
Suno kay alyas “Jonel” matapos iya nga ginbungguan sang suspek gilayon man ini nga nagpangayo sang pasensya apang ginapahayag nga kaangay pang-insulto sa iya.
Bangud sa natabo, may nagluntad nga mainit nga pagbinaisay sa tunga sang biktima kag sang suspek tubtob nga ginlagas nya sini sang kutsilyo ang biktima kaupod ang iya pamilya.
Bangud sa kahadlok, natigayon nga mabilin ang traysikol sang biktima sa merkado kag nagsakay na lamang sa iban agud magpadulong sa talatapan sang Roxas City PNP.
Mahibaluan nga daan nga hiligut-anon ang ginalantaw nga motibo kag sa karun, padayon nga gina-imbestigahan sang mga otoridad ang nagluntad nga insidente.
