BOMBO ROXAS – Nangin madinalag-on kag matalunsay ang una nga adlaw sang Major Road Clearing Operation sa mga dalanon sa syudad sang Roxas.
Ini ang ginpahayag ni Mr. Ronald Amigo, ang Assistant Department Head sang Roxas City Government sang mainterview sang Bombo Radyo Roxas.
Suno kay Amigo nga nakita sini ang kooperasyon sang mga pumuluyo kabangdanan nga nangin maayo ang dalagan kag resulta sang operasyon.
Aminado man ini nga may pila pa ka mga obstruksiyon sa dalan apang indi sini makabig nga dako ini nga sablag sa dalanon.
Suno pa sa opisyal nga igalakip nila sa assessment ang tanan nga mga nakita nga kinahanglan pa nga i-improve.
Gindayaw man sini ang mga katapo sang Traffic Management Unit (TMU) bangud sa matawhay nga dalagan sang trapiko samtang wala naman nakaeksperyensya sang kabudlay ang Task Force sa Burgos Talipapa, Burgos Street bangud boluntaryo nga nagpresentar ang mga vendors nga sila na mismo ang maghimos sang ila nga pwesto agud indi makatuga sang sablag sa sidewalk.
May pila man ka mga naghinyo nga hatagan sila sang isa tubtob duha ka adlaw nga palugit agud himuson ang tagsa ka mga illegal structures nga nagatuga sang okstruksiyon sa dalan.
Nagapasalamat man ini sa tanan nga nagabug-os sang task force kag nag-upod sa una nga adlaw sang implementasyon sang nasambit nga operasyon.
