Hugot nga ginpanginwala sang Malacañang ang mga alegasyon ni anay kongresista Zaldy Co batuk kay Presidente Ferdinand Marcos Jr.
Sa isa ka press briefing, ginpahayag ni Presidential Communications Office (PCO) Secretary Dave Gomez nga ang mga pahayag ni Co “baseless” kag “hearsay” lang.
Ginpanindugan sini nga si President Marcos ang una nga nagbuyagyag sang mga iregularidad sa flood-control projects kag nagmando sang imbestigasyon kag reporma agud malikawan ang pag-abuso.
Ginklaro ni Department of Budget and Management (DBM) Secretary Amenah Pagandaman nga ang tanan nga ginaproponer nga proyekto sang Presidente ang nalakip sa National Expenditure Program (NEP). Suno sa iya, sa tion nga masumiter na ang NEP sa Kongreso, indi na magpartisipar ang Ehekutibo sa proseso sang bicameral.
Sa pihak nga bahin, ginbuyagyag ni PCO Undersecretary Claire Castro nga himo-himo lamang ang mga pahayag ni Co agud makalikaw sa imbestigasyon. Dugang pa sini nga naglutaw ang ngalan ni Co sa flood-control probe bangud sa mga dokumento kag testimonya, indi bangud sa ginhimo sang Presidente.
Ginpanindugan sini nga wala sang “panic mode” sa Palasyo sa pihak sang mga alegasyon kag protesta. Suno sa iya, normal lang nga bantayan sang gobyerno ang mga destabilization threats.
Samtang ang mga pahayag ni Co ang makabig nga “game over” para sa Administrasyon suno kay anay chief presidential legal counsel nga si Salvador Panelo, ilabi na kun mapamatud-an nga matuod ang mga alegasyon batok kay Presidente Marcos bangud sa “betrayal of public trust” nga isa ka impeachable offense.
Dugang pa ni Panelo, kun mapamatud-an nga may kahilabtanan ang Presidente kag ang iya mga kaalyado sa Kongreso kag DPWH sa ginapahayag maanomaliya, dapat sila manabat kag ipapreso pagkatapos sang due process.
Sa subong, nagapanindugan ang Palasyo nga ang pinakamaayo nga himuon amo nga magpauli si Co agud atubangon ang mga panumbungon kag magtestigo sa nagakaigo nga korte.
