Nagpaguwa sang guidelines ang Malacañang Palace angut sa pagbyahe sang mga opisyal sang Pilipinas padulong sa Taiwan.
Bangud ginpagwa ang Memorandum Circular No. 82 sang Malacañang nga ginpirmahan ni Executive Secretary Lucas Bersamin nga napetsahan Abril 15, 2012.
Ang nasambit nga guidelines ang nasanto sa Executive Order no. 313 nga ginpaguwa sang 1987 nga nagadumili sa mga opisyal sang gobyerno sa pagbisita sa Taiwan kag pagbaton sang opisyal nga mga delegasyon.
Maathag nga ginapahayag sang direktiba nga kun magbiyahe ang mga opisyal sa Taiwan, kinahanglan nga may pahanugot sila gikan sa Office of the President kag sa Department of Foreign Affairs (DFA).
Base sa gin-isyu nga circular, ang Presidente, Bise Presidente, sekretaryo sang DFA kag Department of National Defense ang subject sa mas hugot nga restrictions sa pagbiyahe padulong sa Taiwan.
Ang mga opisyales nga nagabiyahe pakadto sa Taiwan para sa mga katuyuan sa ekonomiya, negosyo, kag pamuhunan kinahanglan nga maggamit lamang sang ordinaryo nga pasaporte kag indi sang ila opisyal nga titulo.
Kinahanglan man nga ipahibalo sa Manila Economic and Cultural Office (MECO) ang katuyuan sang ila biyahe antes magbiyahe kag makig-angot sa ahensiya samtang yara sa Taiwan.
Pagkatapos sang byahe, obligado man sila nga magsumiter sang report sa MECO kag DFA.
Ang mga delegasyon sang Taiwan mahimo nga mabaton kun ini para sa mga katuyuan sa ekonomiya, negosyo, kag pamuhunan, basta mag-agi ini sa MECO, kag may lima ka adlaw nga pahibalo antes ang pagbisita, kag ang isa ka report ginasumiter man sa MECO kag DFA.
Magluwas diri, ginadumilian man ang pagpirma sang anuman nga kasugtanan, memorandum of understanding, exchange of notes, ukon kaangay nga mga dokumento sa tunga sang mga opisyal sang Pilipinas kag Taiwan nga wala sang nagakaigo nga clearance halin sa DFA kag authorization halin sa OP.
Ang mando nagatuyo sa pagpadayon sang One-China Policy kag sa amo man nga tion sa pagpasangkad sang mga oportunidad para sa pagpauswag sang mga yabi nga sektor sang pungsod, partikular sa mga patag sang komersyo kag pamuhunan.
