Makabaton sang discounts ang 149,896 ka mga benepisyaryo sang Pantawid Pamilyang Pilipino Program (4Ps) sa Western Visayas sa ila nga electricity bills pinaagi sa lifeline rate program sang Department of Energy (DOE).
Ang programa ginlunsyar sa rehiyon 6 nga ginpangunahan nanday Energy Secretary Sharon Garin kag Energy Undersecretary Mylene Capongcol.
Suno kay Department of Social Welfare and Development (DSWD) Regional Director Joselito Estember, indi na kinahanglan pa nga magpasa ang 4Ps beneficiaries sang dugang nga requirements ukon magproseso pa sang dokumento.
Pinaagi sa partnership sa Department of Energy, ang DSWD mismo ang magahatag sang listahan sang kwalipikado nga pamilya sa nagkalain-lain nga electric cooperative sa Western Visayas.
Nahibaluan nga ang Lifeline Subsidy Rate Program ang isa ka inisyatibo ang gobyerno nga may katuyuan nga mabuligan ang mga pigado nga pamilya nga mahagan-hagan ang palas-anon sa ila balayran sa kuryente.
Nakarekord sang pinakamataas nga numero sang benepisyaryo ang Iloilo nga may 76,310, ginasundan sang Capiz nga may 25,028, Antique nga may 21,425, Aklan nga may 21,021 kag Guimaras 6,112.
