BORACAY ISLAND — Lauman sa masunod nga semana ang malapnagon nga power interruption sa Isla sang Boracay bangud sa ginapatigayon nga pole relocation sang Aklan Electric Cooperative ukon AKELCO.
Ini kasunod sang nagapadayon nga road clearing kag rehabilitation efforts sang Department of Public Works and Highways (DPWH) sa nagapanguna nga karsada sa isla.
Sa interview sang Bombo Radyo kay AKELCO Area Engineer Jeffrey Inzon, ginpahayag sini nga mahimo maglab-ot sa isa ka adlaw ang blackout sa pila ka bahin sang Boracay bangud sa pagkaayo sang linya kag pagtransfer sang mga poste sang kuryente nga sakop sang road widening project sang DPWH.
Apang ginpasiguro ni Inzon nga indi magdugay ang ginapatigayon nga pole relocation nga maari na nga magsugod sa masunod nga semana agud indi tuman nga mabudlayan ang mga residente sa isla.
Sa karon nagapangayo na sila sang bulig sa mga electric cooperatives sa iban nga probinsiya agud mapadasig ang ginapatigayon nga pole relocation.
Nahibaluan nga magalab-ot sa masobra P96-million ang ginpa-in nga pondo sang DPWH nga gamiton sang AKELCO sa nasambit nga proyekto.
