ROXAS CITY, CAPIZ- Ginpaboran sang isa ka kongresista ang hagna nga ginaduso sa karon ni Senate President Francis ‘Chiz’ Escudero nga pagdumili sa pamilya sang opisyal nga mangin supplier sang proyekto sang Gobyerno.
Sa interview sang Bombo Radyo kay Attorney Nathaniel Oducado, Congressman sang 1Tahanan Party-List, iya ginpahayag nga ang amo nga isyu ang nagapakita sang ‘conflict of interest’ partikular sa interes bilang public official kag sa pribado nga interes. Isa man ini suno sa iya nga pamaagi sa pag-abuso sa budget bracket sa diin nga amo ang gina-umpisahan sang korapsyon.
Dugang pa ni Atty. Oducado, kinahanglan nga ang isa ka public official wala sang hawid nga dako nga negosyo agud maka-focus sa pagpanerbisyo sa tagsa nila ka nasakupan.
Samtang, suno sa iya, kulang ang sa karon nga mga layi nga naga-egsister agud malikawan ang cinflict of interest kag kinahagan suno sa iya nga mahatagan sang nagakaigo nga igtalupangod ang amo nga isyu.
Sa pihak nga bahin, pag-abot sa mga proyekto sang gobyerno partikular na ang flood control project nga namensyunar ni Presidente Ferdinand Marcos Jr. sa ginpatigayon sini nga ika-apat nga State of the Nation Address, ginsiling ni Atty. Oducado nga posible may hawid na nga listahan ang chief executive kag amo ini suno sa iya ang ila nga ginahulat.
Pahayag pa sini, kinahanglan nga palaparon pagid ang amo nga hagna nga ginaduso sang Senate President agud nga mas masiguro nga matapna ang korapsyon, dapat transparent kag masiguro ang accountability kag kinahanglan mangin bukas sa publiko ang mga records bangud suno sa iya ang public office isa ka public trust. Pabor naman ini nga ilakip ang amo nga hagna sa priority bills agud mahatagan sang nagakaigo nga igtalupangod kag solusyon ang ‘padrino system’ nga nagakahinabo sa gobyerno sang pungsod.
Bilang isa ka kongresista, hugot niya nga ginbaton ang mga pahayag ni Presidente Ferdinand Marcos sa iya sini nga State of the Nation Address bangud suno sa iya, bilang isa ka ordinaryo nga pumuluyo, madugay na ini nga ginasinggitan nga tutukan kag tapnaon ang korapsyon sa pungsod.
Wala naman suno sa iya sang dako nga epekto sa panindugan sang Kongreso bangud nga dapat kun magsulod ka sa public service suno sa iya kinahanglan buo ang imo nga integridad kag kaangay nga mas ginpabaskog pa ang luyag nila nga kinahanglan tutukan ang amo nga nagakatabo kag ibutang sa tama nga tawo ang kun ano man nga mga ginaptuman sang gobyerno.
In an interview with Bombo Jessa Mae De Los Santos
