ROXAS CITY – Patay ang isa ka mangunguma matapos nga ginhatok-hatok labo sang kaangay mangunguma, sa Sitio Pangawitaw, Barangay Calapawan, Dumarao, Capiz.
Ginkilala ang biktima kay Noli Halarsis Valle, 44-anyos.
Samtang ang ginatudlo suspek amu si Ricky Dadivas Halarsis, 51-anyos, kag lunsay mga residente sang nasambit nga lugar.
Sandig sa impormasyon nga nakuha sang Bombo Radyo sa Dumarao Municipal Police Station, nagaguwa sa ila inisyal nga imbestigasyon nga alas-9:30 kagab-i sang Domingo sang nagpangsulong ang biktima kaupod ang iya utod nga si Bernardo Valle, sa balay sang suspek, nga yara sa impluwensya sang makahulubog nga ilimnon kag ginaalegar nagpalupok sa guwa sang balay sang suspek, gamit ang bitbit nga armas-luthang.
Bangud sini, ginpahayag nga nagguwa sa iya balay ang suspek kag ginlabo sang makaisa ka beses ang amu nga biktima, apang ginluthang ini kag naigo sa natuo nga kamot kag tiyan.
Diri kag liwat nga ginlabo sang suspek sa magkatuhay nga parte sang lawas sang biktima.
Ginpadangat sang mga katapo sang Dumarao Emergency Response Team (DERT) ang biktima sa Dao District Hospital apang gindeklarar ini nga dead on arrival sang doktor.
Samtang, gin-aresto ang suspek kag gindala sa Mambusao District Hospital apang sang ulihi, gintransfer ini sa Roxas Memorial Provincial Hospital sa syudad para sa nagakaigo nga pagbulong sang naangkon nga pilas tuga sang pagpangluthang.
Nagaguwa sa imbestigasyon nga daan nga hiligut-anon sang maghimata ang motibo sa krimen.
