CUARTERO, CAPIZ– Yara na sa istable nga kondisyon ang mangunguma nga ginlabo sang isa ka lalaki sa Sitio Hanalon, Barangay Malagab-i, Cuartero, Capiz.
Ang biktima amo si alyas “Dan”, 45-anyos, wala sang asawa samtang ang suspek amo si alyas “Chris”, 35-anyos kag lunsay nga mga residente sang nasambit nga lugar.
Sa interview sang Bombo Radyo kay Police Captain Alladen Talaban, Officer In Charge sang Cuartero Municipal Police Station, ginpahayag nga yara na sa maayo nga kondisyon ang amu nga lalaki nga napabilin sa Senator Gerardo M. Roxas Memorial Hospital sa banwa sang Dao.
Madumduman nga natabo ang insidente takna alas 8:40 sa aga sang Mayo 25, 2025 kun sa diin ginpahayag nga nagpadulong ang biktima sa compound ni Barangay Kagawad Gina Gumban kun sa diin nagatinir ang suspek nga si alyas Chris kag nagluntad ang mainit nga komosyon sa tunga sang duha.
Nahibaluan nga sang nagpadulong ang biktima sa amu nga lugar, may dala ini nga binangon kag ginbutang sa gate apang ginhaboy ini sang suspek sa kilid sang karsada kag ginhambalan ang biktima nga magpauli.
Apang, nagkuha sang bato ang biktima kag ginhaboy sini ang isa ka speaker nga ara sa sulod sang compound kun sa diin ginkaakig sang suspek kag gilayon nya ini nga ginlagas kag ginlabo ang biktima.
Samtang, nagapabilin sa kustodiya sang Cuartero Municipal Police Station ang suspek, kalakip ang katana sini nga may kalabaon nga 40.5 pulgada kag, natalana naman ini nga pasakaan sang nagakaigo nga panumbungon.
