ROXAS CITY – Masuwerte nga nabugtawan sang senior citizen nga nagabolante sang utan sa Teodoro Arcenas Trade Center (TATC) ang ginahimo nga pagpangawat sang isa ka lalaki, kaina sang kaaganhon.
Ginkilala ang manugbaligya kay Gloria Presas, 78 anyos kag residente sang Brgy. Baye, Mambusao, Capiz.
Samtang ang suspek amu si Ronilo Deondo, 19 anyos nga residente sang Brgy. Balatucan, banwa sang Panitan.
Sandig sa ginpabalhag nga report ni Presas nga alas-2:30 kaina sang kaaganhon sang nagakatulog ini sa iya puwesto sa may bahin sang dalan, sang nabatyagan sini nga may nagakuha sang iya sling bag nga nagaunod sang P7,000 nga kuwarta.
Gilayon ini nga nagsinggit sang tabang kag natigayon nga malagas sang naka-duty nga security guard sa merkado.
Nadakpan ang suspek kag sa karon yara sa kustodiya sang Roxas City PNP para sa pagpasaka sang nagakaigo nga kaso.
