ROXAS CITY – Ginpanginwala sang manuglikos nga sila ang nagasamad sang arong nga nahamtang sa kalalawran nga sakop sang Roxas City.
Sa interview sang Bombo Radyo kay tatay Toto, isa ka manuglikos, ginpahayag sini nga ginalikawan nila ang mga arong bangud nahibaluan man nila nga kun masamad ini pagasukton sila sang bayad.
Pahayag pa sini nga sa kadamuon nila nga manuglikos indi man nila mahibaluan kun sa diin nagapadulong ang iban.
Matandaan nga nagpalab-ot sang reklamo ang mga magagmay nga mangingisda nga nagikan sa Barangay Dumolog, Cogon kag Culasi sa syudad sang Roxas bangud apektado na ang ila pangabuhianan sa operasyon sang likos nga nagasamad sa ila ginapahamtang nga arong sa kadagatan.
Magluwas sa mga likos, ginapabutyag pa nila ang operasyon sang mga dalagko nga mga sakayan nga padayon sa ila pagpangisda sang iligal.
