ROXAS CITY – Nagdangop sa Bombo Radyo ang isa ka lola agud i-reklamo ang adviser sang iya apo sa Bergante Elementary School sa banwa sang Mambusao, Capiz.
Sa interview kay ginang Elizabeth Marcelo, ginpahayag sini nga iya ginkakibot sang makit-an ang card sang iya apo nga 65 ang grado sa halos tanan nga subjects sa 3rd kag 4th grading.
Ginpanindugan ni Marcelo nga gin-islan sang adviser sang iya apo nga si Mrs. Lourdes Lamayo ang card kag gin-islan ang mga grado bangud wala na ang iya pirma sa likod sang nasambit nga card.
Suno kay Marcelo, posible gindumtan kag ginhingabot siya sang amo nga manunudlo matapos ginreklamo niya ini sang nakaligad nga bulan sang Pebrero bangud sa indi maayo nga mga tinaga nga ginpanghambal angut sa iya apo.
Ginpahayag sini nga ginhambalan siya ni Lamayo nga indi na pagpasudlon ang iya apo nga gintawag pa sini nga ‘bundol’ bangud indi niya luyag nga aku-on ang responsibilidad bilang adviser sang bata.
Bangud diri, ginpalab-ot ni Marcelo ang iya reklamo sa district office sang Department of Education sa amo nga banwa kun sa diin nagpangayo man sang pasaylo si Lamayo.
Apang tuman ang kakibot ni Marcelo sang nagkuha ini sang card sang apo nga kasubong ginbalusan siya ni Lamayo pinaagi sa paghatag sang lagbong nga grado sa iya apo rason nga indi ini makadiretso sa Grade 3.
