ROXAS CITY – Nagdangup sa istasyon sang pulisya ang isa ka public school teacher kag ginreklamo ang pagkadula sang ginhalay nga underwear sa ginarentahan nga apartment sa Alvarez Subdivision, Barangay 10, Roxas City.
Suno kay Maam Jessie indi matood nga pangalan, 45-anyos kag nagatudlo sa isa ka pampubliko nga eskwelahan sa banwa sang Pontevedra, Capiz, nakahalay lamang ini sang ginlabhan nga bayo kag nagapreparar sang ila nga pamahaw sang mga anak sang makita nga nagahulag ang ginhalay nga mga bayo.
Magaguwa kuntani ini sa pirtahan sang may nakita nga lalaki nga nagsaka sa pader, apang sang iya na ginsita, hinali na lamang nga naglumpat kasunod sang pagpaburhot sang tricycle sang mga suspek.
Bangud diri, gilayon nga gintsekyar sang manunudlo ang ginhalay nga mga bayo kag nakibot ini sang indi na makita ang underwear nga ginapatihan gindala sang mga suspek.
Samtang magluwas sa underwear nga gindala sang mga suspek, nabalaka man ang manunudlo nga may iban pa nga motibo ang mga suspek.
Nahibaluan nga may duha ka mga anak nga babaye ang manunudlo nga kaupod sa ginarentahan nga apartment.
