ROXAS CITY – Nakakuha sang atensyon sa mga netizen sasocial media ang istratehiya sang isa ka manunudlo sang Balasan National High School, sa banwa sang Balasan, Iloilo sa pagtudlo sa iya mga estudyante agud ma-inspire pa ang advisory class nga magtuon sang maayo.
Ginpahayag ni Mr. Nonie Boy Campos nga wala gid ini maghuna huna nga mangin viral sa social media ang pamaagi sang iya pagtuldlo sa Grade 9 students, bangud ang yara lamang sa iya pinsar nga mapahangup sa mga estudyante ang ka-importansiya sang edukasyon agud mangin maayo ang ila puturo sa pila ka adlaw kun makatapos sila sa ila pag-eskwela.
Nahibaluan nga antes pa magsugod ang examination sang advisory class ni Campos, makita na sa armchair ang pagkaon nga nasulod sa supot kalakip ang inspiring messages, agud ganahan pa sila sa pag-eskwela.
Naobserbahan man sang manunudlo nga nagayuhom kag excited ang mga estudyante sang ila na mabasa ang kaundan sang sulat sa diin ginakunsidera man ini nga moral boosting sa mga kabataan agud mas ganahan pa sila nga magtuon.
Nagapati man si Campos nga positibo ang epekto sang ginhimo sini nga strategy in teaching bangud nag-ayo pa ang relasyon sang manunudlo kag mga estudyante
Magluwas diri, nagahatag man si Campos sang reward sa mga estudyante nga may maayo nga binuhatan sa ila klase sa sulod sang isa ka semana, agud ipakita nga ginakilala ang mga nagahimo sang maayo sa ila klase.
Sa pihak nga wala na sang mabilin sa iya sweldo kag masami nagahulam ini sa iya ginikanan, apang wala niya ginahinulsulan ang iya ginahimo, bangud ang passion sa pagtudlo yara sa iya tagipusoon.
Suno pa kay Campos nga bilang isa man ka manunudto gina-estorya sini ang estudyante nsa iya maobserbahan ngagasuprer sang problema kadungan ang paglaygay.
Indi lamang kutob sa mga estudyante ang paghatag sini sang inspiring message kag pagkaon, bangud ginsuguran naman ni Campos ang pagpakig-angut sa ginikanan sang Grade 9 students, pinaagi sa pagtext sa ila kag pagsugid sa maayo nga nahimuan sang mga kabataan sa ila klase, rason nga pag-abot pa lamang sang mga estudyante sa ila balay, nagayuhum na sila nga ginasugata sang ila ginikanan nga very proud sa ila nangin achievement sa eskwelahan.
Samtang ginpasalamatan man ni Campos ang iya ginikanan, bangud sa suporta nga ginhatag sa iya sa diin nahibaluan nga ginabuligan pa siya sa pagpamutos sang mga pagkaon nga iya ginahatag sa mga estudyante sa tagsa ka adlaw sang eksaminasyon.
