ROXAS CITY – Ginpanindugan ni Master Teacher 1 Reynaldo Durana ang nagtulod sa iya para magpasaka sang complaint letter batuk sa ila principal amo ang pagkabalaka sa Dao Elementary School nga ginserbehan sini sang katunga na sa iya kabuhi kag ang kaluoy nga nabatyagan sa mga kabataan nga kabahin sang feeding program sang eskwelahan, apang wala nakapulos bangud sa korupsyon nga nagakahinabo kag iregularidad sa ila nga eskwelahan sa idalum sang pagdumala ni Mrs. Judith Tu.
Suno kay Durana nga wala sila sang lainay sang buot sang ila principal, apang ang luyag lamang sini kag iban nga mga kaupdanan nga manunudlo nga matadlong ang sala kag magkadto sa nagakaigo nga proyekto ang napa-in nga pondo kag indi sa bulsa sang tawo.
Ginapanindugan ni Durana nga wala sang proper liquidation sa mga gingastusan sang MOOE.
Apisar may yara sang transparency board, apang wala ginpahamtang diri ang approved liquidation report gikan sa division office.
Sa isyu naman angut sa ginpaubra nga furniture nga ginkuha ang pondo sa MOOE, handa nga pamatud-an ni Durana ang nakapagkit sa letter complaint nga ang gindala lamang sa division office ang duha ka sofa.
Mabakud ang ila ebedensiya nga ginauyatan bangud mismo ang driver sang trak nga ginkargahan sang mga furniture ang nagsugid sa ila.
Samtang pag-abot naman sa feeding program, aminado ini nga dismayado ini sa natukiban nga anomaliya bangud wala sang ginpatuman sang ensakto ang programa para sa mga undernourished nga mga kabataan.
