Arestado ang isa ka market vendor nga nagbaligya sang iligal nga sigarilyo matapos ang ginpatigayon nga law enforcement operation sang mga otoridad, sa Brgy. Vizcaya, President Roxas, Capiz.
Ang nadakpan amo si alyas ‘Erwin’, 45-anyos, kag residente sang Brgy. Poblacion Sur, sa amo nga banwa.
Sa interview sang Bombo Radyo kay Police Captain Semdan Sitchon, Chief sang Capiz Maritime Police Station, iya ginpahayag nga madugay na nila nga ginamonitor ang amo nga aktibidad rason nga natigayon nga nadakpan ang amo nga persona.
Nakuha sa paghinakop sang nadakpan ang 90 ka reams sang RGD Classic Red Cigarettes nga ginabulubanta nagabalor sang ₱97,200, isa ka unit sang cellphone nga nagabalor ₱5,000 kag tricycle nga wala sang plaka.
Kaso sa paglapas sa Republic Act 8424 ukon ang Tax Reform Act of 1997 kag Republic Act 10643 ukon ang Graphic Health Warning Law ang pagaatubangon sang nadakpan.
Sa subong, yara na sa kustodiya sang Capiz Maritime Police Station ang nadakpan para sa nagakaigo nga disposisyon.
