Masami nga ginabahaan ang ginapahayag ginatudlo nga rason kun ngaman na-delay ang pag-construct sang tulay sa Barangay Lus-onan sa banwa sang Panay.
Sa interview sang Bombo Radyo kay Punong Barangay Jorgie Dice sang Barangay Lus-onan, ginpahayag sini nga sang tuig 2021 pa sang ginsuguran ang pag-construct sa amo nga tulay kag may yara nga time frame nga mahuman ini sa sulod sang 6 months tubtob 1 tuig apang tubtob sa karon wala sa gihapon mahuman.
Dugang pa sini, may yara ini sang alokasyon nga P136 million nga budget kag may joint resolusyon nga ginhimo ang lima ka mga kabarangayan nga naga-request sa opisina sang isa ka senador sa pag-construct sini humalin sa Brgy. Lus-onan padulong sa Brgy. Magubilan kag sa amo man nga tion, na-aprubahan ini kag ginhatag ang nasambitan nga balor sang alokasyon pinaagi sa Department of Public Works and Highways, Regional Office.
Ang ini nga proyekto yara sa IBC Construction nga kontraktor sa superbisyon sang DPWH Capiz 1st District kag ini lang man ang nagahikot sini tubtob sa karon.
Matandaan nga nagapamangkot ang mga pumuluyo sang nasambit nga barangay kun san-o pa ini matapos.
Wala man nagahatag sang klaro nga sabat ang Department of Public Works and Highways (DPWH) Capiz 1st Engineering District kun anu na ang estado sang nasambit nga proyekto.
Nahibaluan nga ang tulay maga-angot halin sa barangay Lus-onan pakadto sa Barangay Magubilan kag sa kaiping nga kabarangayan sa banwa sang Panay.
Dugang pa ni PB Dice, sa karon ginaproseso na nila ini ilabi na ang mga residente nga apektado sa sini nga proyekto nga kun sa diin magahatag ini sila sang financial assistance kag sa bulig man sang LGU-Panay, magahatag man suno ini sang relocation site para sa mga naapektuhan nga residente.
