CAPIZ – Kabug-osan nga 479 na nga mga anay katapo sang rebelde nga grupo sa Western Visayas ang nagbalik sa sabak sang gobyerno.
Sa interview sang Bombo Radyo kay Capt. Neil Lagaña, 301st Brigade Civil Military Operations Officer sang Philippine Army, iya ginpahayag nga sa nasambit nga numero, 357 na ang nahatagan sang nagkalain-lain nga reintegration programs agud mabuligan nga mabalik sa normal ang pagpangabuhi sang mga anay communist terrorist group.
Nagapati si Lagaña nga manubo sa 20 na lang ang mga myembro sang New Peoples Army nga ginalagas sang mga soldado.
Suno sa iya, mas maayo nga magbalik na sa sabak sang gobyerno ang nabilin nga myembro agud indi na maglab-ot pa sa punto nga mag-engkwentruhanay naman kag may mapilasan ukon may mapatay.
Sang damlag lang, nag-surrender sa 301st Infantry Brigade si Johnny Emolaga, alias “Mego”, 31, residente ng Brgy. Alameda, Igbaras, Iloilo kag Commanding Officer sang Komiteng Rehiyong–Panay (KR-Panay) matapos ang engkwentro sa Tapaz, Capiz sang Setyembre 20, sa diin nakaangkon ini sang pilas sa tiil.
