Masobra sa 5,000 ka Capiznon ang yara karon sa nagkalain-lain nga pungsod sa Middle East sa tunga sang nagapadayon nga tensyon sa tunga sang Iran kag Israel.
Sa interview sang Bombo Radyo, ginpahayag ni John Leo Marcos D. Beldia, PESO Manager sang Probinsya sang Capiz, nga base sa ila inisyal nga monitoring, ang nasambit nga listahan amo ang numero sang mga Capiznon nga narehistro sa ila database nga nagaubra ukon naga-istar sa nasambit nga rehiyon.
Suno sa iya, 3,311 sa amo nga numero ang nagpalista sa online , samtang 1,775 naman ang nagparecord paagi sa pagpadulong sa ila opisina.
Pahayag pa niya, may yara sang 4,951 ka mga Capiznon nga yara sa Middle East nga mga Overseas Filipino Workers (OFWs) ukon nagaubra sa nagkalain-lain nga industriya sa nasambit nga mga pungsod, samtang 135 naman ang ginakabig nga non-OFW, ukon yara didto bangud sa iban nga mga rason kaangay sang pag-eskwela, pag-asikaso sang pila ka mga dokumento kag pagbisita ukon pag-upod sa ila mga pamilya.
Dugang pa niya, padayon ang monitoring sang PESO Capiz sa kahimtangan sang mga Capiznon sa Middle East rason nga naga coordinate man ini sa nagkalain-lain nga ahensya sang gobyerno agud masiguro nga may yara sang bastante nga impormasyon kag bulig para sa mga Capiznon kun magkinahanglan ini sang assistance.
Nagpahanumdom man ang natungdan sa mga yara karon sa Middle East nga maghalong, mangin aligmat, magsunod sa mga patakaran kag regulasyon sang pungsod nga ginatiniran, kag magpadayon sa pagmonitor sang mga advisory kag pahibalo sang Philippine Embassy sa ila tagsa ka lugar agud masiguro ang ila kaluwasan kag malikawan ang bisan ano nga peligro nga mahimo nila maatubang sa tunga sang nagapadayon nga tensyon sa rehiyon.
