ROXAS CITY – Nadiskubrehan sang isa ka mangunguma kag handler nga kulang na ang ginahuptan nila nga manok sa ila game farm sa Barangay Cabugao, Roxas City.
Ginkilala ang tag-iya sang farm kay Romeo Saldo, 59-anyos, negosyante kag residente sang Daang Hari, Bicutan, Taguig.
Sandig sa ginpabalhag sang handler nga si Alejandro Saldo, 57-anyos, kag residente sang nasambit nga barangay, nga sa iya pag-tsekyar sang mga manok mga alas-6 sa aga, natalupangdan sini nga nagkaladula na ang 32 ka bilog sang pambulang kag munga nga manok sa ila farm.
Ginapatihan sang tagreklamo nga ginkawat sang wala makilala nga persona ang amu nga kasapatan.
Sa dugang nga imbestigasyon sang mga kapulisan, natukiban nga wala sang kudal ukon nagaserbe pader ang amu nga farm.
Yari ang ginhatag sang handler nga presyo sang mga manok nga nagkaladula:
16 ka bilog sang ordinaryo nga munga: P10,000 kada bilog
6 ka ordinaryo nga pambulang: P6,000 kada bilog
6 ka bilog sang brood Cock nga ginalakipan sang:
*2 ka bilog nga nagabalor sa P150,000 kada isa
*2 ka bilog nagabalor sang P50,000 kada isa
*2 ka bilog nagabalor sang P40,000 kada isa kag
4 ka bilog sang brood Hen: P15,000 kada bilog.
Bangud sini, nagdangat sa P786,000 ang kabug-osan nga kantidad sang ginpangawat nga mga manok.
Padayon ang ang ginahimo nga imbestigasyon sang mga kapulisan angut sa insidente.
