PRES. ROXAS, CAPIZ – Ginpasalamatan kag gin-athag sang mayor-elect sang banwa sang President Roxas ang opisyal nga pagproklamar sa iya matapos nangin madinalag-on sa 2025 Midterm Elections.
Sa interview sang Bombo Radyo kay Mayor-elect Receliste Escolin, sang amu nga banwa, gin-athag sini nga ‘Cancelation of Certificate of Candidacy’ ang ginpetisyon sa iya kag indi ‘disqualification’ sa iya nga pagka-kanditatura bilang alkalde sang nasambit nga banwa.
Bangud sini, pormal sya nga gindeklarar sang COMELEC bilang nagdaog sa amu nga posisyon sa nagtakop nga Midterm Elections.
Dugang sini, wala sang kamatuoran ang ginahaboy nga alegadyon sa iya nga wala siya nag tuman sa layi kag direktiba sang gobyerno.
Suno pa siya, magapadayon ang iya mga programa para sa ikasanag sang banwa sang Pres. Roxas,ilabi na ang iya proyekto nga Integrated Terminal, pagpasangkad sa suplay sang tubig sa mga kabarangayan, flooding control kag waste management.
Samtang, mapina-ubuson nga nagpasalamat liwat ang alkalde sa suporta halin sa iya partido kag sa mga bag-o nga napilian nga opisyal, nga magabulig kag suporta sang mga proyekto kag polisiya para sa ikaayo sang tagsa-tagsa.
Mensahe naman sini sa publiko nga padayon nga nagahatag sa iya sang kabakod sa pagpangalagad, determinasyon,inspirasyon kag mangin ehemplo sang maayo nga lider sa banwa sang Pres. Roxas ang serbisyo kag pagpangalagad nga tampad.
