ROXAS CITY – Na-implementar ni Mayor Henry Tumlos sang Pontevedra ang iya ginpromisa nga mga proyekto kag programa sa mga pumuluyo sa sulod sang 100 ka adlaw sang iya nga administrasyon.
Sa pagpakig-angut sang Bombo Radyo kay Mayor Tumlos, masadya sini nga ginpakigbahin nga nangin madinalag-on ang iya ika-100 ka adlaw nga pagserbe sa pumuluyo.
Madamo suno diri ang pagbag-o sa iya kabuhi bangud nakita niya nga natuman tanan ang iya ginpromisa ilabi na ang priority projects kalakip na ang libre nga bugas para sa mga pumuluyo sang Pontevedra nga nagsugod sang Oktubre 5 sa Brgy. Linampongan kun sa diin 500 packs tanan ang ginpanghatag.
Ginsiguro man sang alkalde nga magapadayon sa iya bug-os nga termino kag maka-ambit ang tanan sang bugas.
Ginaamat-amat na niya suno diri patigayon ang iban pa nga mga nakalinyada nga proyekto kag plano man ni Mayor nga ipakay-o ang merkado, plaza kag munisipyo.
Ginapromisa man sang alkalde nga madamo pa ang ila himuon nga proyekto kag programa para sa tuig 2023 para sa ikaayo sang pumuluyo kag banwa sang Pontevedra.
