ROXAS CITY –Ginpanindugan ni Tapaz Mayor Roberto Palomar nga gin-akomodar sang maayo sang lokal nga gobyerno sang Tapaz ang mga Overseas Filipino Worker (OFW) repatriates nga ginapaidalum sa 14 day quarantine sa Tapaz National Highschool.
Kasunod ini sang reklamo sang pila ka mga OFW repatriates nga nahigkuan sa quarantine facility sa Tapaz National High School.
Ginpahayag ni Palomar nga wala sang may nabaton nga reklamo ang talatapan sini angut sa mahigko nga quarantine facility sang mga OFW repatriates.
Suno kay Palomar nga maayo ang kahimtangan sang 15 ka mga OFW repatriates nga ginaquarantine sa nasambit nga buluthuan sa diin tanan nga ila kinahanglanon ang ginhatag sang lokal nga gobyerno sang Tapaz kalakip na ang mga pagkaon.
Gindugang pa sang alkalde nga may mga kaugalingon nga hulot ang mga repatriates sa nasambit nga buluthuan apang mahimo man nga malimpyuhan sang mga repatriates ang mahigko nga mga hulot kalakip ang mga banyo.
Samtang aminado si Palomar nga wala mapreparahan sang lokal nga gobyerno sang Tapaz ang gulpi nga pag-abot sang mga repatriates.
Suno sa kay Palomar nga ginkakibot sini ang gulpi nga pag-alabutan sang mga repatriates rason nga kun ano ang available nga mga quarantine facilities amo ang ginprovide sang lokal nga gobyerno sang Tapaz.
