Nakipagsinapol si Mayor Besa sa mga katapo sang Department of Works and Highways (DPWH) kaupod ang pila ka mga contractors kaangut sa mga flood control projects sang banwa sang Panay.
Sa interview sang Bombo Radyo kay Mayor Besa, ginpahayag sini nga nangin mabinungahon ang pakigsinapol sini sa talatapan kaupod ang pila ka mga contractors bangud may mga bagay sila nga naklaruhan sa estado sang mga proyekto.
Suno sa iya, sa anum ka on-going flood control project sang banwa ,may yara na lamang sang duwa ka proyekto ang na-delay bangud sa problema sa dalan ukon right of way.
Dugang pa ni Besa , isa man sa rason nga nagpatawag siya sang pagsinapol bangud nadiskubrehan niya nga ang mga contractor wala sang may ginabayaran nga contractor’s fee nga kung sa diin daku pa tani nga dugang nga bulig sa income sang banwa.
Pahayag pa niya, nga ginpatawag nya man ang mga Kapitan sang tagsa ka barangay sang banwa agud pahanumduman nga mangin aligmat kag makig-angut sa local government unit kung may nakit-an nga kapalpakan sa pag implementar sang proyekto. Nahibaluan nga ang duwa ka flood control project sang banwa ang yara sa idalum sang Alpha and Omega General Contractor And Development Corporation nga ginapanag-iyahan sang mag-tiayon nga Curlee kag Sarah Discaya.
