ROXAS CITY – Posible pa nga madugangan ang medalya sang Western Visayas sa nagapadayon nga Palarong Pambansa 2024 sa Cebu City.
Ini ang suno kay Mr. Ronnie Reteracion, DepEd Sports Coordinator, sang ma-interview sang Bombo Radyo.
Ginpahayag sini nga epektibo ang training sang mga atleta bangud nangin maayo ang mga performance sini.
Samtang nagnubo suno diri ang medalya sang dancesports kun ikumparar sang nagligad nga tuig apang posible nga madugangan pa ang mga medalya sa nagapadayon nga mga sporting events kaangay sang pencak silat, taekwondo kag poomsae.
Sa karon, nagapabilin sa ikatatlo nga puwesto ang Western Visayas sa nagapadayon nga Palarong Pambansa kun sa diin as of 12:00 pm may yara na sang 19 ka gold, 19 ka silver kag 18 ka bronze medals ang Rehiyon VI.
Nagapanguna naman ang NCR nga may 37 ka gold, 21 ka silver kag 32 ka bronze medals samtang nagapangaduha ang Region IV-A (CALABARZON) nga may 30 ka gold, 16 ka silver, kag 25 ka bronze medals.
