Ginbawian na sang kabuhi ang isa ka menor de adad, samtang ginabulong sa isa ka ospital sa syudad sang Roxas.
Sa interview sang Bombo Radyo kay PCPT Rey Dordas, hepe sang Mambusao PNP, ginkilala kay alyas “Toto” ang biktima kag residente sang Brgy. Caidquid, Mambusao, Capiz.
Matandaan nga sang Huwebes nga adlaw, Septyembre 12, nagluntad ang pagbungguanay sang duwa ka motorsiklo sa Brgy. Burias, Mambusao kun sa diin backrider ang amo nga biktima sa ginasakyan sini nga motorsiklo.
Dugang pa ni Dordas, ginpadangat pa ang biktima sa isa ka pribado nga ospital sa syudad sang Roxas apang takna 1:28 sang kaaganhon sang Byernes, Septyembre 13 gindeklarar nga ginbawian na ini sang kabuhi.
Samtang, ang tatlo naman ka persona nga nagkalapilasan ang outpatient na kag padayon pa nga ginabulong sa Mambusao District Hospital ang driver sang motorsiklo nga ginasakyan sang biktima.
Sa karon, nakahamyang na sa isa ka punerarya ang bangkay sang amo nga biktima.
