ROXAS CITY – Wala makasalbar sa kamatayon ang isa ka menor de edad nga lalaki matapos ginpulihan kastigo sang duha ka mga persona sa Sitio Maralusa, Barangay Atiplo, Mambusao, Capiz.
Natabo ang insidente alas-11:50 kagab-i sang Domingo, Mayo 15.
Ang wala na ginhingadlan nga menor de edad ang nagapang-edaron sang 16-anyos kag residente sang nasambit nga barangay.
Samtang ang mga suspek ang gintudlo nga sanday John Andro Miguel Iringan, 20-anyos kag Albert Vito Laberos, 31-anyos lunsay mga residente sang amu man nga lugar.
Sandig sa imbestigasyon ni PSSg. Ivan Camacho sang Mambusao MPS, nga samtang nagapauli ang tatlo ka mga persona, nagikan sa inuman sa birthday party, sang hinali nga nagsinggit si Laberos kag nagpanghangkat sang inaway, gintambagan ini sang biktima, apang gilayon ginsumbag sa dughan kag ginpasundan ni Iringan sang tapungol sa baba’ rason nga natumba ang menor de edad.
Wala pa diri natapos bangud ginaalegar nga ginpulihan pa sang duha sang tapungol ang nasambit nga biktima tubtob nadulaan ini sang alinto.
Ginpadangat pa sa Mambusao District Hospital ang biktima apang gindeklarar ini nga dead on arrival sang doktor.
Natigayon man nga madakpan ang mga suspek kag sa karon nakahunong sa karsel sang Mambusao MPS para sa nagakaigo nga disposisyon.
