Nadiskubrehan ang mga armas kag bala nga ginapatihan ginapanag-iyahan sang Communist Terrorist Group sa nabukid nga bahin sang Barangay Acuña, Tapaz, Capiz.
Sa interview sang Bombo Radyo kay Captain Jessie Jun Ebalan, Chief sang 3rd Infantry Division Public Affairs Office sang Philippine Army, iya ginpahayag nga natigayon ang operasyon bangud sa ginpalab-ot nga impormasyon sang pila ka sibilyan sa lugar angut sa mga armas sang rebelde.
Suno kay Ebalan, na-recover sang mga katapo sang militar sa nasambit nga operasyon ang g isa ka unit sang 5.56mm Rifle, M16A1 , apat ka Magazines Assembly sang 5.56mm Rifle ,lima ka Magazines Assembly, sang 5.56mm 20 cap (Alluminum), 215 rounds sang bala sa 5.56mm, Ball, M193 kag isa ka bandolier.
Pahayag pa niya, posible nga hungod nga ginbilin sang mga miyembro sang rebelde nga grupo ang mga armas bangud sa kakulang na sang ila nga mga miyembro.
Samtang, bukas man sila sa posibilidad nga may yara sang iban nga talaguan sang armas kag bala ang grupo sa iban pa nga bahin sang probinsya sang Capiz.
Sa subong, ginapabilin sang natungdan nga hugot ang seguridad sa Barangay Acuña, Tapaz, Capiz agud ma-proteheran ang kaluwasan sang mga pumuluyo sa nasambit nga lugar.
