ROXAS CITY – Ginkalipay nga ginpakigbahin sang pinuno sang Roxas Memorial Provincial Hospital (RMPH) nga ginagamit na sa karon sang ospital ang mga bag-o nag-abot nga makinarya kag kagamitan, nga ginpondohan sang katapusan nga quarter sang 2022.
Sa interview sang Bombo Radyo kay Dr. Florencio Luching, ginpahayag sini nga dako ang pagpasalamat sini bangud ginagamit na sa karon sang mga pasyente nagikan sa operating kag emergency rooms ang mga equipment kaangay sang para sa ultra sound, 20 ka mga stretchers, 2 ka operating room light, operating machine, x-ray machines kag mga apparatus.
Samtang, ginpabugal man ni Luching ang nagapadayon nga konstruksyon sang Gugma Dialysis center, sa Barangay Lanot, Roxas City, nga natalana nga pagabuksan antes magtakup ang Hunyo, 2023 kun sa diin may yara ini sang 15 ka mga high-end machines.
Pag-abot sa bulong sa RMPH, ginpahayag ni Luching nga yara sa 95 porsyento ang suplay sa nasambit nga ospital.
Nahibaluan nga suno kay Luching, ginpondohan sang nagligad nga tuig ang pagbakal sang mga equipment sa balor nga P50 miilion, kag posible pa nga magabakal subong nga tuig bangud isa sa prayoridad ni Governor Fredenil Castro ang ikaayong lawas sang Capiznon.
