ROXAS CITY – Ginhidlaw ang pila ka mga pumuluyo sa syudad sang Roxas sa pagkaon sang panginhason, matapos nga ginpahanugutan na sang City Government ang pag-harvest, pagkaon kag pagbaligya sini, nga makuha sa kalalawran sang syudad.
Sa pagpadulong sang Bombo Patrol team sa Teodoro Arcenas Trade Center (TATC) talalupangdon nga madahog ang mga baligya nga panginhason sa merkado.
Suno sa pila ka mga tindera, may pipila pa nga nagapamangkot kun sa diin nagikan ang mga panginhason nga ila baligya apang ginasabat sang mga ini nga nagikan diri sa Roxas City kag may pila ka mga nagikan sa Isla Gigantes sa Iloilo.
Yari ang presyo sang mga panginhason sa merkado:
Tahong – P70-P80
scaloops – 70-P80
bagongon – P20/kada tabo
talaba – P50-kilo kada tabo; P300/balde
bilao – P20/tumpok P80/kilo
Matandaan nga sandig sa ginpaguwa nga Shellfish Bulletin No. 01 series of 2023, sang BFAR-VI, nakasaad nga ginapahanugotan na sang ahensiya ang pagharvest, pagkaon kag pagbaligya sang mga panginhason nga magagikan sa kalalawran sang Roxas City, Sapian Bay (Ivisan kag Sapian).
Samtang positibo sa gihapon sang red tide ang coastal waters sang Panay, President Roxas kag Pilar.
