ROXAS CITY – Ginpaidalom na sa ballistic examination ang narekober nga mga basiyo sang kalibre .45 nga armas-luthang nga narekober sa lugar kun sa diin ginluthang-patay sang wala pa matumod nga mga riding-in-tandem sa Barangay Bolo, Roxas City.
Ini ang ginpahayag sang medico-legal officer sang Capiz Provincial Crime Laboratory nga si Police Lieutenant Joe Martin Fuentes sang mainterview sang Bombo Radyo.
Suno kay Fuentes, pito tanan ka mga patal nga pilas ang naangkon sang biktima nga si Junifer Borda, isa ka retirado nga suldado kag naga-trabaho bilang officer-in-charge sa Gold Claw Security Agency.
Nagapati si Fuentes nga tuyo gid nga patyon sang mga suspek ang biktima bangud madamo nga beses ini ginluthang kag patalikod pa ini nga gintiro.
Matandaan nga una na nga ginpahayag ni Police Master Sergeant Ramil Arcangeles, tagpamaba sang Roxas City Police Station nga base sa ila maid-id nga imbestigasyon kag sa pag-tsekyar sa closed-circuit television (CCTV) footages, kapin duha ka metros lamang ang antad sang mga suspek sa pagluthang sa biktima.
Ginapahayag nga ang backrider sang motorsiklo ang nagserbi nga gunman ukon nagpangamot sa pagluthang sa biktima nagserbi nga driver ang kaupod sini.
Indi man malayo nga posible kilala sang biktima ang mga suspek bangud kasubong nga gin-monitor ang hulag sini ilabi pa nga may dala siya nga dako nga kantidad sang kwarta nga nagalab-ot sa mas o menus P100, 000.
Ang nasambit nga kwarta ang ipa-sweldo kuntani sa mga guwardiya sa idalom sang ginatrabahuan nga ahensiya sang biktima.
Suno kay Arcangeles nga ginturn-over naman sa Provincial Crime Laboratory ang narekober nga mga basiyo sang kalibre .45 nga armas-luthang sa ginluntaran sang insidente para mapaidalom sa ballistic examination.
Gindugang pa sini nga nagapadayon man ang ila maid-id nga imbestigasyon agud matumod ang mga suspetsado sa nasambit nga krimen.
