ROXAS CITY – Ginhimay-himay sang provincial election officer ang mga ginabawalan nga bulohaton sang mga kandidato sa pagsugod sang kampanya sa lokal nga lebel sa Biyernes nga adlaw, Marso 25.
Sa interview sang Bombo Radyo kay Atty. Salud Milagros Villanueva, provincial election officer sang Comelec-Capiz, ginpahayag sini nga sa idalom sang layi, hugot nga ginapagbawal ang paghatag sang kuwarta ukon ano nga kagamitan ukon pagkaon sang isa ka kandidato sa botante, bangud makonsider ini nga akto nga isa ka sahi sang vote buying.
Apang, ginklaro sang opisyal nga maaksyonan gid lamang ini sang ahensya kun may yara sang formal complaint sa ila, agud masumiter sa ila law department.
Samtang, pag-abot sa rekorida, ginsiling sini nga indi bawal ang amu nga bulohaton sa election campaign period, apang kun makaistorbo na ini sa mahamuok nga pagtulog sa kagab-ihon, may yara sang iban nga layi nga mahimo malapas sang amu nga pagrekorida.
Sa pihak nga bahin, mahimo man nga ma-report ang isa ka persona kun maaktuhan nga nagapangkakas sang campaign materials nga wala sang mandu sang Comelec.
Pahanumdom ni Villanueva sa mga lokal nga kandidato, nga magsunod gid lang sa ginapatuman nga layi, samtang para naman sa mga supporters, indi pagpasobrahan ang pagsuporta sa nahamut-an nga kandidato, sa baylo, magbinuligay para sa malimpyo kag malinong nga palaabuton nga eleksyon sa Mayo 9, 2022.
