ROXAS CITY-Ginkompirmar sang talatapan sang City Social Welfare and Development Office ukon CSWDO nga nagikan sa mga barangay officials ang listahan nga ginabasehan sang talatapan sa paghatag sang tunga sa sako sang bugas gikan sa gobyerno sang siyudad.
Ini ang ginpahayag ni CSWDO-Head Simeonette Beluso sang mainterview sang Bombo Radyo Roxas.
Suno sa kay Beluso nga gikan sa barangay ang listahan sang mga benepisyaryo nga makabaton sang tunga sa sako nga bugas , apang gin-athag sini nga ginpaidalum man ini sa maid-id nga validation antes gin-release ang bugas.
Ginkumpirmar man sini nga may mga ginkakas sila nga mga pangalan nga yara sa listahan bangud indi kwalipikado nga makabaton sang tunga sa sako nga bugas.
Gindugang pa ni Beluso nga may mga natukiban sila sa ila pag-evaluate nga may mga manggaranon nga nga ginlakip sa listahan.
Ginklaro man sini nga wala ginalakip ang mga nagalumon sa balay sa diin isa lang gid ang makabaton sa kada panimalay.
Samtang padayon sa karun ang pagpanagtag sang CSWDO sa 19 ka mga kabarangayan sa syudad mga wala pa nakabaton sang tunga sa sako nga bugas.
