ROXAS CITY – Ginmandu na sang Food and Drug Administration ang pagpa-recall sa mga brands sang langgaw nga may sangkap nga synthetic acetic acid.
Ini ang kasunod sang pagpaguha sang listahan sang ahensiya sang mga substandard nga langgaw nga napamatud-an nga wala nakapasar sa ila nga quality standards bangud may yara ini sang nasambit nga kemikal.
Sa interview sang Bombo Radyo kay Maria Angeles Guzman, Regional Supervisor sang FDA Regional Field Office 6, ginpahayag sini nga apisar wala sang health risks ang langgaw nga may sangkap nga synthetic acetic acid, ginakonsidera sa gihapon ini nga substandard.
Dapat suno kay Guzman nga naturally-fermented ang langgaw kag wala sang ginahalo nga anuman nga sangkap agud mapadasig ang fermentation sini.
Mahibaluan nga base sa ginpaguha nga listahan sang ahensiya, kalakip sa mga brand sang langgaw nga may nasambit nga kemikal amo ang Surebuy Cane Vinegar, Tentay Pinoy Style Vinegar, Tentay Premium Vinegar , Tentay Vinegar ‘Sukang Tunay Asim’ at Chef’s Flavor Vinegar.
