BOMBO ROXAS – Boluntaryo nga nagpalab-ot sang bulig ang mga katapo sang bumbero sang Bureau of Fire Protection – Maayon Fire Station sa pamilya nga biktima sang sunog sa Sitio Cabanbanan, Barangay Canapian sang nasambit nga banwa.
Ginkilala ang tag-iya sang puluy-an nga si Gemma Marcelino, 51 anyos kag residente sang nasambit nga lugar.
Sa interview sang Bombo Radyo Roxas kay Senior Fire Officer 2 Ramel Arquisola, OIC – Municipal Fire Marshal sang BFP-Maayon Fire Station nga totally-burned ang puluy-an sang nasambit nga biktima matapos ang nagluntad nga sunog, alas 10 takna sa aga sang nakaligad nga Disyembre 15 sini nga tuig apang kahapon lamang, Disyembre 22 ini nagpahibalo sa mga otoridad.
Suno kay Arquisola nga sang nagluntad ang sunog, wala sang tawo ang nasambit nga puluy-an.
Samtang sa pahayag ni Marcelino kay Arquisola nga nagpanggas sang mais ang tatlo sini ka mga kabataan samtang nagpadulong naman ini sa Tuburan National High School agud magkuha sang modules sang mga kabataan sini.
Mahibaluan nga natalupangdan na lamang sang isa ka manugpanggas man sang mais nagatuga na sang pag-asó ang puluy-an sang biktima kabangdanan nga madasig sini nga ginpahibalo ang mga kabataan ni Marcelino.
Wala na matigayon nga mapalong ang kalayo bangud nagadalagan sa duha (2) ka kilometros ang kalayuon sang puluy-an sa ginapanggasan sang mais sang mga biktima.
Sa dugang nga imbestigasyon sang mga bumbero, nagaguha nga antes magbiya padulong sa eskwelahan ang nasambit nga iloy, nagtig-ang pa ini sang aga kag posible nga wala sini natalupangdan nga may baga kabangdanan nga gintunaan sang sunog.
Ginabulubanta nga yara sa P15,000 ang inisyal nga kahalitan sang nagluntad nga sunog kun sa diin kalakip sa mga gintupok sang kalayo amo ang P10,000 nga kwarta sini nga inugpatakod kun tani sang kuryente, binhi sang mais kag abono.
Daku naman ang pagpasalamat sang pamilya sa mga katapo sang bumbero sa ginhatag nga mga groceries, mga daan nga panapton kag cash.
Mahibaluan nga wala gid sang may nabilin nga gamit ang pamilya bangud sa nagluntad nga sunog.
