DAO, CAPIZ- Yara sa maayos nga kahimtangan ang tatlo tanan ka mga driver kag isa ka pahenante sang tatlo man ka mga delivery truck nga nagbungguanay sa Barangay Manhoy, Dao, Capiz.
Ang mga driver ang ginkilala nga sanday; alyas Toto, driver 1 nga taga Lambunao, Iloilo, alyas Toto, driver 2 nga taga Lapuz, Iloilo, kag alyas Nonoy, driver 3 nga taga La Castellana, Negros Occidental. Samtang ang pahenante amo si alyas Junjun nga taga Alihis, Bacolod City.
Sa interview sang Bombo Radyo kay Police Staff Sergeant Francis Dordas, Imbestigador sang Dao Municipal Police Station, iya ginpahayag nga nagasundanay ang tatlo ka mga delivery truck sa pareho nga direksyon sang dalan.
Suno kay PSSgt. Dordas, bangud sa mamunog nga pagbubo sang ulan, wala gilayon madiparahan sang nauna nga truck ang nagmenor nga motorsiklo nga iya ginadundan, sa diin nga nagresulta nga wala man gilayon ka preno ang ikaduha kag ikatatlo nga truck nga nagasunod kag nagluntad ang pagbungguanay.
Bangud sa pagbungguanay, nag-angkon sang minor damages ang mga delivery truck.
Nahibaluan nga padulong kuntani sa syudad sang Iloilo ang nauna kag ika-duha nga truck, samtang ang ika-tatlo naman ang padulong sa banwa sang Dumarao agud nga i-deliver ang karga sini nga mga spare parts.
Nagpanawagan naman ang natungdan sa tanan nga mga motorista nga mangin aligmat kag maghalong sa pagmaneho ilabi na sa tion nga naga-ulan agud malikawan ang ano man nga sahi sang insidente ang posible nga magluntad sa dalanon.
Interviewed by Bombo Sunnie Mae Constantino Batencila
