ROXAS CITY – Magapangatubang sa nagakaigo nga penalidad ang mga establisyemento nga madakpan magpasobra sa Suggested Retail Price (SRP) sang mga school supplies, luwas na lamang kun sari-sari store nga sa kabanwahanan pa nagabaligya.
Ini ang ginpahayag ni Mrs. Ken Queenie Cuñada, Provincial Director sang DTI-Capiz sang mainterview sang Bombo Radyo.
Wala sini gintuad ang partikular nga kantidad sang penalidad apang suno diri indi makapatas ang pagpalapaw sa SRP sa paga-atubangon nga kahuy-anan sa kun sin-o man ang madakpan kag kanugon lang kun higkuan pa ang pangalan sang gintukod nga negosyo.
Ba-se sa ila latest monitoring sang tinalikdan nga Biyernes, wala pa man sila nadakpan nga nagbayolar sa SRP kag magasugod naman ang ila monitoring sa school supplies kun mabaton na nila ang mandu gikan sa higher office.
Ginkumpirmar ni Cuñada nga may pagtaas sa SRP sang school supplies subong nga tuig ikumparar sa ulihi nga pagbag-o sini sang 2019.
Nagnegosyar naman sila sa mga maufacturers nga kun mahimo indi na magpataas sang presyo, apang nagpakita man ini sila sang datos kun sa diin makit-an ang ila dako nga gastos bangud man sa pagtaas sang presyo sang gatong kag raw materials nga ila ginagamit, gani patas lamang suno diri nga tugutan sila magpataas.
Ginsiguro sang direktor nga gamay lamang ang pagtaas nga sarang sa gihapon mabakal, sa mga ordinaryo nga produkto may pagtaas sa menus P1 samtang ang mga fast moving/ selling kasubong sang premium ukon branded nga produkto may pagtaas sa P3-P5.
Apisar may gamay nga pagtaas, ginpahayag ni Cuñada nga magadepende sa bumalakal kun ano ang ila luyag baklon.
Gani panugyan sini sa mga ginikanan nga may mga estudyante nga kabataan, mangin wais sa pagbakal kag pilion ang masarangan sang budget, indi pagkalimtan magkomparar agud makapili sang maayo nga produkto.
