ROXAS CITY – Pagbakas sa pag-eskwela sang iya estudyante nga produkto sang isa ka ‘broken family’ ang nangin inspirasyon sang isa ka public school teacher agud masulat ang ambahanon nga ‘Balang Araw’ nga nakasulod bilang semifinalist sa Bombo Music Festival 2020.
Sa interview sang Bombo Radyo kay Mr. Ramie Capuyan sang Barangay Maindang, Cuartero, Capiz, ginpahayag sini nga bangud sa iya nga propesyon, nakit-an niya ang kabudlay sang isa ka estudyante nga separado ang mga ginikanan.
Sa pihak sini suno sa iya, nagabakas sila agud maangkon ang ila mga handom sa kabuhi.
Luyag nga ipalab-ot sang ambahanon nga ginsulat ni Capuyan nga magaabot ang adlaw nga makaupod sang estudyante ang iya ginakahidlawan nga ginikanan kag madula ang kasubo nga iya nabatyagan.
Sa karon, nagapabilin nga positibo si Capuyan kag nagaapelar sang pangamuyo sa mga Capizeño nga malakip ini sa Top 12 Grand Finalists sang Bombo Music Festival 2020.
