ROXAS CITY – Nangin positibo ang reaksyon sang congressman sang 1st district sang Capiz sa una nga State of the Nation Address (SONA) ni President Ferdinand “Bongbong” Marcos kahapon nga adlaw, Hulyo 25.
Sa initerview sang Bombo Radyo kay Hon. Emmanuel “Tawi” Billones, 1st District Congressman sang Capiz, iya ginpahayag nga nagakadapat hatagan sang “benefit of the doubt” ukon saligan ang mga ginlatag nga programa ni PBBM bangud nagapati siya nga sarang sang presidente nga mapatuman ini.
Suno man sa iya nabatian sa una nga SONA, pinakamaayo nga pagplastar ini sang programa ni Pres. Marcos kun sa diin ginpatpat man sang presidente ang nagkalain-lain nga problema sang pungsod sa sektor sang ekonomiya, ikaayong lawas kalakip ang pandemya, edukasyon, agrikultura kag iban pa nga iya man ginlatagan sang nagakaigo nga tikang agud masolusyunan kag tinguwaan nga masolbar sa sulod sang 6 ka tuig.
Kun hatagan sang grado ang nangin SONA, 80% ang iya igahatag nga marka apang luyag sini bantayan sa gihapon amu man sang pumuluyo kun matuman ang mga gindihon nga promisa sang presdente.
Nagapati man si Billones nga padulong sa progreso sang pungsod ang mga ginlatag nga proyekto kag programa ni PBMM kasubong sang pagdugang sang imprastraktura, pagpauswag sang turismo, kag pagpalawig sang produksyon sa sektor sang agrikultura.
