ROXAS CITY -Ginatugyan sang pamunuan sang Traffic Management Unit (TMU) sa mga kapulisan sa siyudad ang pag-imbestigar sa likod sang ilIgal nga palumba-anay sa Barangay Bato, Roxas City.
Ini ang ginpahayag ni Mr. Gonzalo Andrada, Consultant sang TMU sang napakig-angutan sang Bombo Radyo.
Sa pagpangusisa sang TMU, ginpahayag ni Andrada nga matapos nga wala nadayon ang palumba-anay sa Barangay Bato sining siyudad, ginpadayon sang mga ini ang nasambit nga palumba-anay sa Barangay Capagao, Panitan Capiz.
Suno kay Andrada nga isa sa mga natumod nila nga mga nagamaneho sang motorsiklo amo si “alyas Justine”.
Magluwas diri, may pila man ka mga indibidwal nga nagapartisipar sa nasambit nga palumba-anay nga na gikan sa iban nga mga kabanwahanan.
Gindugang pa ni Andrada nga nagalab-ut sa kapin sa P100,000 ang ginapusta sang mga nagapatigayon sang nasambit nga palumba-anay.
Samtang ginkompirmar man ni Andrada nga magluwas sa Barangay Bato, nagapatigayon man sang iligal nga palumba-anay sa may circumferential road sa Barangay Culasi sining siyudad.
