Daku ang posibilidad nga magsaylo sa kooperatiba ang mga jeepney operator nga nakapa-consolidate na para sa modernization program pananglitan nga pwersahon ini nga magkuha sang mga bag-o nga unit nga nagabalor masobra P2-M ang isa.
Sa interview sang Bombo Radyo kay Jobert Carandang Presidente sang Piston Capiz nga may ara sang petisyon ang Manibela kag Piston nga ginapadala sa tanan nga miyembro may kaangtanan sa pag-withdraw sang pagpaconsolidate kag paghalin sa kooperatiba, indi paman mahambal ni Carandang sa karun kung pila ang maga-upod ra pagpirma sa amu nga petisyon.
Dugang pa ni Carandang nga posible nila ipalab-ot sa lokal nga gobyerno sang Capiz nga magpapasar sang resolusyon nga nagapamatok sa programa sang modernisasyon kaangay sang ginhimo sang mga opisyal sa syudad sang Bacolod.
Samtang indi naman mag-upod ang mga jeepney operator sa Capiz sa tion nga magprotesta ukon mag-untat byahe ang mga kaupdanan sa Metro Manila bangud mas importante nga may ipauli sila nga kita sa tagsa ka pamilya.
