ROXAS CITY, CAPIZ – Ginpasakupan sang mga kabataan nga nagikan sa nagkalain-lain nga buluthuan sa probinsiya sang Capiz ang ika-38 nga Red Cross Youth Summer Camp Training sang Philippine Red Cross – Capiz Chapter nga ginapatigayon sa Congressman Ramon A. Arnaldo High School (CRAAHS) sa Barangay Banica, Roxas City.
Sa interview sang Bombo Radyo kay Mr. Raymund Martinez, Administrator sang Philippine Red Cross – Capiz Chapter, iya ginpahayag nga pila sa mga aktibidad nga ginatudlo sa training amo ang pag-enhance sang capability sang mga ‘youth’ ukon kabataan nga mag-response sa tion sang kalamidad, survival skills kag decision making sa tion sang emerhensya, leadership training, team building kag madamo pa nga iban.
Suno kay Martinez nga may lecture man nga gina-conduct may kaangtanan sa ikaayong lawas, blood donor recruitment kag pag-intindi sa hazard.
Nahibaluan nga nagsugod sang Mayo 25 ang Red Cross Youth Summer Camp Training kag magatakop sa Mayo 29.
