ROXAS CITY – May ginatutukan na ang mga kapulisan sa siyudad sang Roxas nga mga persons of interest nga posible yara sa likod sang ‘bomb threat’ sa Filamer Christian University sa Barangay 11, Roxas City.
Ini ang ginpahayag ni Police Lieutenant Colonel Ricardo Jomuad Jr. sang mainterview sang Bombo Radyo.
Suno kay Jomuad, may mga indibidwal na sila nga ginatutukan nga posible responsable sa pagpalapta sang text messages nga nagapahayag may gintanom nga bomba sa sulod sang nasambit nga unibersidad.
Nahibaluan pa nga mga estudyante man ang ginapatihan yara sa likod sini.
Apang suno kay Jomuad, indi pa nila ini mabuyagyag sa publiko agud indi maapektuhan ang ila imbestigasyon.
Mahibaluan nga masobra duha ka oras nga ginkordon ang nasambit nga unibersidad antes dalayon na deklarar nga ‘bomb free’ ukon hilway sa anuman nga sahi sang bomba.
