ROXAS CITY – Preparado na sa pagpartisiparar ang Roxas City PNP sa pagatigayunon nga Brigada Eskwela 2022 sa mga buluthoan sa syudad sumugod sa masunod nga semana kun sa diin magadeploy ini sang 10 ka mga personnel sa tagsa ka mga eskwelahan.
Ini ang ginpahayag ni PLt.Col Aron Palomo, hepe sang Roxas Component City Police Station sang mainterview sang Bombo Radyo.
Suno diri, naghatag na ini sang direktiba sa Police Community Relation Affairs Section nga atipanon ang mga kinahanglanon sang mga buluthoan kaangay sang face mask kag alcohol para sa nahilapit nga pagbukas sang klase.
Naga-apelar naman ang opisyal sa may mga bulawanon nga tagipusuon nga pwede makahatag sang mga materyales kasubong sang pinta, tabo, balde, alcohol nga mahimo magamit sang eskwelahan kag mga estudyante.
Nagapangabay man ini sa mga ginikanan nga edukaron sang mga ini ang ila mga kabataan nga halongan ang ila kaugalingon, propedad kag likawan ang magsakay sa colorum nga traysikol kag unahon ang seguridad sang ila mga kabataan.
