PANAY, CAPIZ- Nalipay ang mga mangunguma sa banwa sang Panay matapos sila nakabaton sang libre nga binhi gikan sa Department of Agriculture (DA) – Western Visayas.
Sa interview sang Bombo Radyo Roxas kay Melchor Villano, isa sa nakabaton sang binhi kag residente sang Barangay Maguibilan sa banwa sang Panay, iya ginpahayag nga daku ini nga bulig sa ila nga mga mangunguma agud makabangon sa epekto sang pagbaha sa ila mga ulumhan tuga sang malain nga tyempo sang nagligad nga mga semana.
Nahibaluan nga ang distribusyon sang binhi kabahin sang regular nga programa sang Department of Agriculture nga nagapanghatag sang certified seeds agud mabuligan ang mga lokal nga mangunguma sa pagpataas sang ila ani kag kita.
Lakip sa ginpanagtag amo ang hybrid kag certified rice seeds nga makabulig sa mas epektibo kag mas produktibo nga pagtanom, ilabi na sa mga lugar nga naapektuhan sang bag-o lang nga pagbaha kag kakulang sang abot sang una nga cropping season.
Nagpasalamat ang mga benepisyaryo sa DA kag sa lokal nga gobyerno sang Panay sa padayon nga suporta nga ginahatag sa sektor sang agrikultura.
With a report from Bombo Jessa Mae De Los Santos
