ROXAS CITY, CAPIZ- Nagtuga sang tuman nga pagkabalaka kag pagkadismayado sa hanay sang mga manunudlo sa pungsod ang nagalapta sa karon nga alegasyon may kaangtanan sa pag-invest sang Government Service Insurance System (GSIS) fund sa isa ka kompanya nga may koneksyon sa online gambling.
Sa interview sang Bombo Radyo kay Mrs. Rowena Aristoque, Principal I sang Don Francisco Dinglasan Memorial School sa Barangay Punta Tabuc, Roxas City, iya ginpahayag nga kaangay isa ka sahi sang iresponsable nga pagdumala ang pag-invest sa isa ka industriya nga may malain nga reputasyon kag indi nagasanto sa katuyuan sang benepisyo sang mga empleyado sang gobyerno ilabi na ang mga manunudlo.
Dugang pa sini, nabudlayan sila sa paghulog sa bulanan nga kontribusyon, tapos mahibaluan lang nila nga gingamit gali ini sa sugal -kaangay nga gintunto sila.
Hugot man nga ginsiling ni Mrs. Aristoque nga nagasalig sila sa amo nga ahensya apang ginakabalak-an na nila sa karon kun mahimo pa nila nga ma-avail ang tagsa nila ka mga kontribusyon ukon may yara na sang mga tikang angut diri.
Nagalaum ang amo nga Principal nga mahatagan sang kaathaagan ang tagsa ka mga myembro sang Government Service Insurance System angut sa nasambit nga paggamit sang pondo sa online gambling.
With a report from Bombo Jessa Mae De Los Santos
