ROXAS CITY – Gindeklarar nga persona non grata ang mga miyembro sang CPP-NPA ukon Communist Party of the Philippines – New People’s Army sa banwa sang Cuartero, Capiz.
Ang pagdeklara sang banwa ginhimo sa ginhiwat nga Municipal Peace and Order Council pinaagi sa isa ka resolusyon.
Suno kay Police Chief Mary Grace Borio, wala na sang lugar ang mga rebelde nga grupo nga magpatigayon sang mga kalakasan.
Ginganyat man ni Borio ang suporta kag kooperasyon sang mga pumuluyo.
Subong man, pinaagi sa Enhanced Comprehensive Local Integration Program (E-Clip) sang gobyerno, madamo na nga mga rebelde ang nagsungka kag nagbalik sa sabak sang gobyerno.
Mahibaluan nga ang barangay Puti-an, Sinabsaban, Mahunod-hunod kag Carataya ang mga lugar sa banwa sang Cuartero nga hilway na sa mga rebelde nga grupo.
Sa karon, mas nagakitid na ang dalan sang mga rebelde ilabi pa nga ang mga pumuluyo na ang nagapanindugan kontra sa mga gina-ubra nila nga kalakasan.
