ROXAS CITY, CAPIZ- Ginkumpirmar ni Punong Barangay Nestor Buenviaje sang Barangay Punta Tabuc, Roxas City nga indi mga pumuluyo sang amo nga lugar ang mga nagkaladakpan sa ginpatigayon nga search warrant operation sang mga kapulisan sa Sitio Railway.
Sa interview sang Bombo Radyo, iya ginpahayag nga ang tatlo ka mga nadakpan pumuluyo sang Barangay Dinginan, Barangay IX, Roxas City kag ang isa ang taga banwa sang Panitan.
Madumduman nga bangud sa pagpalupok sang armas-luthang natigayon nga naimplementaran sang search warrant ang amo nga mga persona.
Nakuha sa paghinakop sang mga ini ang isa (1) ka unit sang granada, isa (1) ka unit sang armas-luthang nga .38 caliber revolver kag apat (4) ka mga live ammunitions sini kag isa ka bag.
Nagapangatubang sa karon ang mga ini sa kaso nga paglapas sa Republic Act 10591 ukon “Comprehensive Firearms and Ammunition Regulation Act.”
Sa karon, nagapabilin ang mga ini sa kustodiya sang Roxas City Police Station para sa nagakaigo nga disposisyon.
Reported by Bombo Sunnie Mae Constantino Batencila
