ROXAS CITY, CAPIZ- Madugay na nga ginamonitor sang mga otoridad ang mga indibidwal nga nagkaladakpan sa ginpatigayon nga drug-buybust operation sang mga katapo sang Philippine Drug Enforcement Agency (PDEA) Capiz sa isa ka drug den sa Sitio Railway, Barangay Punta Tabuc, Roxas City.
Ang nagkaladakpan amo sanday Josemar Adremesin, 32-anyos, subject person kag residente sang Barangay IX, Roxas City, Roel Martizano, 24-anyos sang Barangay Punta Tabuc, Roxas City, Seraphin Naig, 37-anyos sang Barangay Tiza, Roxas City, kag Camille Duron, 38-anyos sang Barangay Baybay, Roxas City.
Sa interview sang Bombo Radyo kay Punong Barangay Nestor Buenviaje sang amo nga lugar, iya ginpahayag nga lunsay mga pumuluyo sang ila nga barangay ang guha ka mga indibiwal apang ang duha, lunsay nga mga pangayaw.
Suno kay Buenviaje, yara sa lista sang Barangay Anti-Drug Abuse Council (BADAC) Watchlist ang amo nga main subject sang buybust.
Nakuha sa paghinakop sang mga ini ang 18 tanan ka sachets sang ginpatihan shabu nga may kabug-aton nga 25 gramos kag ginabulubanta nagabalor P225,000, P500 buybust money, isa ka coin purse nga nagaduag sang gray, duha ka multi-colored lighter purse, isa ka unit sang cellphone, isa ka lighter, syam ka aluminium foil strips, kag duha ka bilog sang improvised tooter.
Nagpahanumdom naman ang Punong Barangay sa iya nga mga nasakpan nga untaton na ang amo nga mga buluhatoon kag magpangita nalang sang malimpyo nga mga trabaho.
Interviewed by Bombo Sunnie Mae Constantino Batencila
